Plantun de Prouvènço

Pèr coumpara dos planto d'encò nostre

Myricaria germanica & Aegilops cylindrica

Myricaria germanica

Tamaricaceae

Noms en français : Myricaire d'Allemagne, Petit Tamaris.

Descripcioun :
La tamarisso-d'Alemagno, dóu gènre Myricaria, trachis dins li limas de ribiero majamen en Mountagno. Li grano podon èstre empourtado mai bas. Douno d'èr à uno pichoto tamarisso, pamens l'enflourejado èi mai longo e pus espèsso emé de flour pu grando. I'a dous cop mai d'estamino que de petalo. Apoundèn que li flour soun bèn mai grosso e lou boursèu peréu (> 7 mm de long).

Usanço :
Coume pèr lis àutri tamarisso, la rusco èi diuretico, astringènto, sudorifico e aperitivo. Li jóuini pousso sarien bono pèr lucha contro lou manco de plaqueto sanguino.

Port : Aubret
Taio : 0,5 à 2 m
Fueio : alterno
Tipe bioulougico : Faneroufite
Cicle bioulougico : Planto renadivo

Gènre : Myricaria
Famiho : Tamaricaceae

Ordre : Caryophyllales

Coulour de la flour : Roso
Petalo : 5
Ø (o loungour) flour : 5 à 6 mm
Flourido : Printèms - Estiéu

Sòu : Ca
Autour basso e auto : 700 à 2000 m
Aparado : Noun
Mai à juliet

Liò : Limas de ribiero - Ribiero
Estànci : Mountagnard à Subaupen
Couroulougi : Éurasiatico-Cèntre-Ouèst
Ref. sc. : Myricaria germanica (L.) Desv., 1824

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.